త్రికరణశుద్ధిగా చేసిన పనులకు దేవుడు మెచ్ఛును లోకము మెచ్చును |
ఒకటికోటి గుణితంబగు మార్గములుండగ ప్రయాస పడనేల ||
తనమనసే పరిపూర్ణమైన గోదావరిగంగాకావేరి |
కనకబిందు యమునాగయాది ముఖ్యక్షేత్రంబుల సంతతమున్ |
దినకరసోమగ్రహణకాలముల తీర్థాచరణలు చేసిన ఫలములు |
తనుతానే సిద్ధించును ఊరకె దవ్వును తిరుగగ మరియేల ||
హరియను రెండక్షరములు నుడివిన అఖిలవేదములు మంత్రములు |
గరిమ ధర్మశాస్త్రపురాణాదులు క్రమముగ చదివిన పుణ్యములు |
పరమతపోయోగంబులు మొదలగు బహుసాధనముల సారంబు |
పరిపక్వంబై ఫలియించంగా బట్టబయలు వెదకగనేల ||
మొదల శ్రీవేంకటపతికిని చేయెత్తి మొక్కినమాత్రము లోపలనే |
పదిలపు షోడశదాన యాగములు పంచమహా యజ్నంబులును |
వదలక సాంగంబులుగా చేసిన వాడేకాడా పలుమారు |
మదిమది నుండే కాయక్లేశము మాటికి మాటికి తనకేల ||
